Azərbaycanda neonatal skrininq proqramının pilot layihəsi hazırlanıb.
Medpress.az bildirir ki, bu haqda K.Fərəcova adına Elmi Tədqiqat (ET) Pediatriya İnstitutunun direktoru, Səhiyyə Nazirliyinin pediatriya üzrə baş mütəxəssisi Nəsib Quliyev məlumat verib. Onun sözlərinə görə, artıq skrininq üçün avadanlıq sifariş olunub.
Nəsib Quliyevin sözlərinə görə, pilot layihənin hazırlanmasında məqsəd yeni doğulanlar arasında tez-tez rast gəlinən fenilketonuriya, hipotireoz, mukovissidoz, adrenogenital sindrom, qlikogenoz kimiirsi xəstəliklərin erkən diaqnostikasını təmin etməkdir.
Baş pediatr deyib ki, ana südü ilə qidalanmanın kütləviliyini təmin etmək məqsədi ilə təbii qidalanma üzrə klinik protokollar hazırlanıb, eyni zamanda, doğum evlərində uşaqların qidalandırılması ilə bağlı monitorinqlərə başlanılıb: “Əsas məqsəd ölkədə uşaq ölümü göstəricisini yaxın bir-iki il ərzində inkişaf etmiş ölkələrin göstəriciləri səviyyəsinə çatdırmaqdır”.
Onun dediyinə görə, 2018-ci ilin 11 ayı ərzində ölkədə 119 769 nəfər uşaq dünyaya gəlib: “2017-ci ilin müvafiq dövrü üçün bu göstərici 126 693 nəfər təşkil edib”.
