“Alkoqolizm xəstəliyi ilə bağlı Respublika Narkoloji Mərkəzinə əsasən dağ rayonlarından müraciətlər daha çox olur”, – APA-nın xəbərinə görə, bunu Respublika Narkoloji Mərkəzinin (RNM) şöbə müdiri Pərvin 
Məmmədov deyib.
Şöbə müdirinin sözlərinə görə, digər narkoloji xəstəliklərdən fərqi olaraq alkoqol birbaşa sinir sisteminə məhvedici təsir göstərir, insanda şəxsiyyətin aşınmasına səbəb olur: “Şəxsiyyət aşındıqca isə insanın normal psixi fəaliyyəti və özünə tənqidi zəifləyir. Alkoqolizmin gecikmiş mərhələdə daha çətin müalicə olunur”.
P.Məmmədov qeyd edib ki, alkoqol orqanizmə qəbul olunan andan hüceyrələr səviyyəsində öldürücü təsir etməyə başlayır: “Alkoqolizm bütün narkoloji xəstəliklər kimi sosial, bioloji, hüquqi, psixi pozuntularla müşahidə olunur və bu pozuntular hamısı birlikdə aradan qaldırılmasa, alkoqolizm xəstəliyinin müalicəsi çox çətin olur. Biz xəstələrdə əsasən bioloji və psixi pozuntuları aradan qaldırırıq. Müalicə davamlı şəkildə aparılsa, alkoqolizm xəstəliyi müalicə olunan xəstəlikdir”.
