Azərbaycandakı 3500-ə yaxın talassemiyalı xəstə var və onlardan 1200-ü qan transfuziyasından asılı olanlardır. Son dörd ildir nikaha daxil olan cütlüklər tibbi müayinədən keçirlər. Həmin müayinələr nəticəsində hər il təxminən 200-ə yaxın talassemiya xəstəsi qeydə alınırdı. Lakin son statistikaya görə, bu rəqəm azalaraq 90-100 nəfərə düşüb. Bu, talassemiya xəstələrinin sayının xeyli dərəcədə azaldığını göstərir.
Medpress.az-ın xəbərinə görə, bu haqda Talassemiya Mərkəzinin icraçı direktoru Valeh Hüseynov kütləvi informasiya vasitələrinin nümayəndələrinə müsahibəsində məlumat verib.
“Talassemiya xəstələrinin sayının azalmasında maarifləndirici və profilaktik tədbirlərin də rolu var. Mərkəzimiz bununla əlaqədar olaraq mütəmadi tədbirlər keçirilir. Ötən ilin noyabrından etibarən Mingəçevir, Qax, Şirvan şəhərlərində belə tədbirlər təşkil olunub. Bu ay Lənkəranda simpoziumun keçirilməsi nəzərdə tutulub. Lakin simpoziumları davam etdirməyi, yekun tədbiri isə təxminən mayda Bakıda keçirməyi planlaşdırmışıq”, – icraçı direktor bildirib.
Valeh Hüseynov talassemiyadan ölüm hallarının qarşısının alınması üçün vaxtında müayinədən keçməyin və diaqnoz qoyulmasının vacibliyini diqqətə çatdırıb: “Əgər pasiyent vaxtında mərkəzə müraciət edərsə və xəstəlik aşkarlanarsa, o zaman lazımi tədbirlər görüləcək və daim nəzarətdə olacaq. Yaşı 50-dən çox olan talassemiya xəstələri var. Onlar da sağlam insanlar kimi ailə qura, övlad sahibi ola bilirlər. Ümumiyyətlə, talassemiyanı xəstəlik yox, yaşam tərzi kimi qəbul etmək lazımdır”.
O, mərkəzdə artıq bir neçə ildir sümük iliyi transplantasiyasının həyata keçirildiyini diqqətə çatdırıb. Valeh Hüseynov deyib ki, bu günədək 75-dən çox sümük iliyi transplantasiyası icra olunub. İcraçı direktor gələcəkdə xəstələrin donor problemlərini həll etmək üçün tək qohumluq transplantasiyasının deyil, eyni zamanda, beynəlxalq donor registrlərinə qoşularaq ölkəmizdə sümük iliyi və donor bankının yaradılmasının planlaşdırıldığını deyib.
